ދިރާގުން ދޭ ލޯންޗު ހޯދުމުގެ ފުރުސަތު ހަމަވަނީ

ދިރާގުން މިހާރު ކުރިއަށް ގެންދާ "ވިން އަ ސްޕީޑް ބޯޓް" ޕްރޮމޯޝަންގައި ބައިވެރިވުމުގެ ފުރުސަތު މި މަހުގެ 15 ވަނަ ދުވަހު ހަމަވާނެ އެވެ.

ދިރާގުގެ އަހަރީ ދުވަހާ ގުޅިގެން ފެށި މި ޕްރޮމޯޝަނުގައި ބައިވެރިވެވޭނީ ދިރާގުގެ 400ރ. އިން މަތީގެ ޕޯސްޓްޕެއިޑް ޕެކޭޖު ގެންގުޅޭ ކަސްޓަމަރުންނާއި ފައިބާ 40އެމް ޕެކޭޖުން މަތީގެ ޕެކޭޖުތައް ގެންގުޅޭ ކަސްޓަމަރުންނަށާއި 400ރ. އިން މަތިން ރީޗާޖުކުރާ ޕްރީޕެއިޑް ކަސްޓަމަރުންނަށެވެ. އަލަށް އެ ނެޓްވޯކާ ގުޅި މި އަގުތަކުން މަތީގެ ޕެކޭޖުތައް ނަގާ ކަސްޓަމަރުންނަށް ވެސް ޕްރޮމޯޝަނުގައި ބައިވެރިވެވޭނެ އެވެ.

މި ޕްރޮމޯޝަނަށް ޝަރުތު ހަމަވާ ކަސްޓަމަރުންނަށް ޕްރޮމޯޝަނުގައި ބައިވެރިވެވޭނީ "ވިން އަ ސްޕީޑްބޯޓް" ޕޯޓަލްއިން އެންރޯލްކޮށްގެންނެވެ.

މި ޕްރޮމޯޝަނުގައި ދިރާގުން ދެނީ އަލްޝާލީ މެރިންގެ "މަޖެލަން 32" ލޯންޗެވެ. އެ ލޯންޗަކީ 12 މީހުންގެ ޖާގައިގެ، 32 ފޫޓުގެ ލޯންޗެކެވެ. މި ލޯންޗުގައި ޔަމަހާގެ 175 ހޯސްޕަވަރުގެ ދެ އިންޖީނު ހުންނާނެ އެވެ. މިއީ އަރާމު ޑެކަކާއި ހިތްފަސޭހަ ކެބިންއަކާއި ބަދިގެއެއް ވެސް ހިމެނޭ ލޯންޗެކެވެ. މިއީ ޕިކްނިކް ދަތުރު ދިޔުމަށް ނުވަތަ މަސް ދަތުރު ދިއުމަށް ކަމުދާނެ ލޯންޗެއް ކަމަށް ދިރާގުން ބުނެ އެވެ.

މި ޕްރޮމޯޝަނަކީ މިދިޔަ ސެޕްޓެމްބަރު މަހު އެ ދިރާގުން ފެށި ޕްރޮމޯޝަނެކެވެ.