ހުޅުމާލޭގެ ދެވަނަ ފިޔަވަހިން އަނެއްކާވެސް ބިން ވިއްކަން ހުޅުވާލައިފި

އެޗްޑީސީ އިން އަށް ވަނަ ފަހަރަށް ހުޅުމާލޭގެ ދެވަނަ ފިޔަވަހިން ބިން ވިއްކަން ހުޅުވާލައިފި އެވެ.

އެ ކުންފުނިން ކުރި އިއުލާނުގައިވާ ގޮތުން 10 ބިމެއް ވިއްކަން ވަނީ ހުޅުވާލައިފަ އެވެ. އޭގެ ތެރޭގައި ބީޗްފްރޮންޓުގެ ތިން ބިމަކާއި ބީޗް ސައިޑުގެ ހަތް ބިމެއް ހިމެނެ އެވެ.

ބީޗް ފްރަންޓުން ވިއްކަނީ 1،550-3،250 އަކަފޫޓުގެ ދެމެދުގެ ބިންތަކެވެ. ބީޗް ސައިޑުން ވިއްކަނީ 1،230 އަކަފޫޓާއި 1،534 އަކަފޫޓާ ދެމެދުގެ ބިންތަކެކެވެ.

ބީޗް ފްރަންޓުން ވިއްކަނީ އަކަފޫޓެއް 4،500ރ. އަށެވެ. އެހެންވެ، އަލަށް ހުޅުވާލި 1،550 އަކަފޫޓުގެ ބިމުގެ އަގު 7 މިލިއަން ރުފިޔާ އަށް އަރަ އެވެ. ބީޗް ފްރަންޓުން ހުޅުވާލި 3،250 އަކަފޫޓުގެ ބިމުގެ އަގު 14.6 މިލިއަން ރުފިޔާއަށް އަރަ އެވެ. ނަމަވެސް ބިން ވިއްކާނީ ބިޑް އުސޫލުންނެވެ.

ހުޅުމާލެ 2 ގެ ބީޗް ސައިޑުން ބިން ވިއްކާ އެންމެ ދަށް އަގަކީ އަކަފޫޓެއް 4،000ރ. އެވެ. އެހެންވެ، އަލަށް ހުޅުވާލީ ހަތް ބިމުގެ ބީލަން ފެށޭ އަގު އުޅެނީ ފަސް މިލިއަން ރުފިޔާ އާއި 6.1 މިލިއަން ރުފިޔާއާ ދެމެދުގެ އަގުތަކެއްގަ އެވެ.

މިދިޔަ ނޮވެމްބަރު މަހު ވެސް އެޗްޑީސީއިން ވަނީ ހުޅުމާލޭގެ ދެވަނަ ފިޔަވަހިން އަށް ބިމެއް ވިއްކަން ހުޅުވާލައިފަ އެވެ. އޭގެ ކުރިން އޮކްޓޫބަރު މަހު 18 ބިމެއް އަދި ސެޕްޓެމްބަރު މަހު 16 ބިމެއް ވިއްކަން ވެސް ހުޅުވާލި އެވެ. އެޗްޑީސީއިން މިއަހަރު ބިން ވިއްކަން ހުޅުވާލީ މެއި މަހު އެވެ.

އޭގެ ފަހުން މިއީ ބިން ވިއްކަން ހުޅުވާލާ އަށް ވަނަ ފަހަރު އެވެ. މީގެ ކުރިން ހަތް ފަހަރު މަތިން ވިއްކި ބިންތަކުގެ އަދަދު ގާތްގަނޑަކަށް 70 އަށް އަރަ އެވެ.

މި ބިންތައް ވިއްކަން އެޗްޑީސީން ހުޅުވާލީ ހަމައެކަނި ދިވެހިންނަށް ގަނެވޭ ގޮތަށެވެ. އުމުރުން 18 އަހަރުން މަތީގެ ކޮންމެ މީހަކަށް ވެސް ބީލަމަށް ކުރިމަތިލެވޭނެ އެވެ. ބީލަން ހުށަހަޅަނީ ކުންފުންޏަކުން ނަމަ އެއީ ރާއްޖޭގައި ރަޖިސްޓަރީ ކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏަކަށް ވާން ޖެހެ އެވެ.

ރާއްޖޭގައި އެންމެ އަގުބޮޑުކޮށް ބިމުގެ އަގު ހުރީ ހުޅުމާލޭގަ އެވެ. މިދިޔަ އަހަރު ވެސް ދެ ފަހަރެއްގެ މަތިން ހުޅުމާލެ އިން ބިން ވިއްކަން ހުޅުވާލި އެވެ. އޭރު ފުރަތަމަ ބުރުގައި 17 ބިމެއް އަދި ދެވަނަ 13 ބިމެއް ވިއްކަން ހުޅުވާލި އެވެ.