އެޗްޑީސީގެ ސޯޝަލް ހައުސިންގެ ޒިންމާތައް އެފްޑީސީއާ ހަވާލުކުރަނީ

އެޗްޑީސީގެ ދަށުން ހިންގާ ސޯޝަލް ހައުސިންއާ ގުޅުން ހުރިހާ ޒިންމާތަކެއް، ފަހި ދިރިއުޅުން ކޯޕަރޭޝަން (އެފްޑީސީ)ގެ ދަށަށް ބަދަލު ކުރަން ނިންމައިފި އެވެ.

އަންނަ އަހަރަށް ލަފާކުރާ ބަޖެޓުގައިވާ ގޮތުން އެފްޑީސީއަށް ސޯޝަލް ހައުސިން ޕްރޮޖެކްޓްތައް ހާއްސަ ކުރަނީ، ސޯޝަލް ހައުސިން މަޝްރޫއުތައް މިހާރަށް ވުރެ ރަނގަޅަށް ދިރާސާކޮށް، އެކަމާ ގުޅޭ އެންމެހާ ކަންކަމުގައި ފޯކަސް ގެއްލުވާނުލައި ސީދާ އެފަދަ މަޝްރޫއުތައް ހިންގުމަށެވެ.

ސޯޝަލް ހައުސިންގެ މަޝްރޫއުތައް އެފްޑީސީއަށް ހާއްސަ ކުރުމުގެ އިތުރުން އެފްޑީސީއަށް ސަރުކާރުގެ ބަޖެޓުން ބަރޯސާވާ ވަރު ކުޑަ ކުރުމަށާއި ގަވަނަންސް ހަރުދަނާ ކުންފުނިތަކުގެ ސަބްސިޑަރީ ހަމަޖެއްސުމަށް އެ ކުންފުނި އެޗްޑީސީގެ ދަށަށް ބަދަލު ކުރަން ވެސް ވަނީ ނިންމައިފަ އެވެ.

ފިނޭންސް މިނިސްޓްރީން ބުނީ އެޗްޑީސީ އާއި އެފްޑީސީ ސިނާޖީ އުފެއްދުމަށްޓަކައި ދެ ކުންފުންޏަށް ވެސް ފައިދާވާނެ ގޮތަށް ޕްރޮކިއުމެންޓް ނިޒާމު ރޭވުމަށް ވެސް ވަނީ ހަމަޖެހިފައި ކަމަށެވެ. އަދި ކުންފުނީގެ ހިންގުން އެންމެ ހަރަދު ކުޑަ ކުރެވޭނެ ގޮތްތަކަށް ބަލައިގެން އެކަން ކުރުމަށް ވަނީ ހަމަޖައްސައިފަ އެވެ.

އެފްޑީސީ އަކީ ސޯޝަލް ހައުސިން މަޝްރޫއުތައް ހިންގަން 2019 ގައި އުފެއްދި ކުންފުންޏެކެވެ. އެ ކުންފުނިން މިހާރު އަންނަނީ ހުޅުމާލޭގައި 4،000 ފްލެޓް އެޅުމުގެ މަސައްކަތް ކުރަމުންނެވެ.

ފިނޭންސް މިނިސްޓްރީން ބުނި ގޮތުގައި އެޗްޑީސީ އިން ސޯޝަލް ހައުސިންއާ ގުޅުން ހުރި ޒިންމާތައް ނެގުމުން، މިހާރަށް ވުރެ ރަނގަޅަށް އެ ކުންފުނި ހިންގާ، އިނީޝަލް ޕަބްލިކް އޮފަރިން (އައިޕީއޯ) އަކަށް ގޮސް، އާންމުންނަށް ހިއްސާ ވިއްކޭ ފަދަ ކުންފުންޏަކަށް ހެދުމުގެ ފުރުސަތު ފަހި ކުރެވޭނެ އެވެ.

އެޗްޑީސީ އެންމެ ފުރަތަމަ އުފެއްދީ 2001 ވަނަ އަހަރު ހުޅުމާލެ ތަރައްގީ ކުރުމަށެވެ. އެއަށް ފަހު 2005 ވަނަ އަހަރު އެ ކުންފުނި ވަނީ ހައުސިން ޕްރޮޖެކްޓްތަކަށް ހާއްސަ ކުންފުންޏަކަށް ބަދަލުކޮށް، ކުންފުނީގެ މެންޑޭޓު ބަދަލުކޮށްފަ އެވެ. އެއަށް ފަހު އެ ކުންފުނިން އަންނަނީ، ހުޅުމާލޭގެ ތަރައްގީގެ މަޝްރޫއުތަކުގެ އިތުރުން ކޮމާޝަލް އަދި ސޯޝަލް ހައުސިން ޕްރޮޖެކްޓްތައް ވެސް ހިންގަމުންނެވެ.

އަންނަ އަހަރު ސަރުކާރު ހިއްސާވާ ކުންފުނިތައް ރިފޯމުކޮށް ބަޖެޓުން ކުންފުނިތަކަށް ކުރާ ހަރަދުތައް ކުޑަ ކުރުމަށް މުހިއްމު މަސައްކަތްތަކެއް ކުރަން ފިނޭންސް މިނިސްޓްރީން ވަނީ ރާވައިފަ އެވެ. އޭގެ ތެރޭގައި ސަރުކާރުގެ ކުންފުނިތަކުގެ ކަންކަން މިހާރު ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ގާނޫނު އުވާލުމަށް ފަހު ދައުލަތުގެ ކުންފުނިތަކާ ގުޅޭ އާ ގާނޫނެއް އެކުލަވާލަން ވެސް ވަނީ ނިންމައިފި އެވެ.