އަމާން ވެށި އަދި އަމާން ހިޔާތަކަށް ދިރާގުން އެހީ ދެނީ

މިނިސްޓްރީ އޮފް ސޯޝަލް ފެމެލީ އެންޑް ޑިވެލޮޕްމަންޓްގެ ދަށުން ރާއްޖޭގެ އެކި ހިސާބުތަކުގައި ގާއިމްކޮށްފައި ހުރި ހުރިހާ އަމާން ވެށި އަދި އަމާން ހިޔާތަކަށް އަންނަ އަހަރު ވެސް ދިރާގުން ހައި ސްޕީޑް އިންޓަނެޓުގެ އެހީތެރިކަން ފޯރުކޮށްދޭން ނިންމައިފި އެވެ.

ދިރާގުގެ ސީއެސްއާރުގެ ދަށުން އެ ތަންތަނަށް މިހާރު ވެސް އަންނަނީ މި ހިދުމަތް ފޯރުކޮށްދެމުންނެވެ.

އެ ކުންފުނިން ބުނީ ސީއެސްއާރު ޕްރޮގްރާމްގެ ދަށުން ފޯރުކޮށްދޭ މި އެހީގެ ސަބަބުން ހަލުވި ސްޕީޑްގައި ދިރާގު ފައިބާ އިންޓަނެޓް ރާއްޖޭގެ އެކި ކަންކޮޅުތަކުގައި ގާއިމުކުރެވިފައިވާ އެފްސީއެސްސީތަކަށް ފޯރުކޮށްދޭނެ ކަމަށެވެ. އޭގެ ތެރޭގައި ބ. އޭދަފުށި، ށ. ފުނަދޫ، ހއ. ދިއްދޫ، ދ. ކުޑަހުވަދޫ، ލ. ފޮނަދޫ، ނ.މަނަދޫ، ޅ. ނައިފަރު، ފުވައްމުލައް ސިޓީ، ކުޅުދުއްފުށި ސިޓީ އަދި ސ. ހިތަދޫ ގައި ހިންގާ އެފްސީއެސްސީތައް ހިމެނެ އެވެ.

މި ޕްރޮގްރާމްގެ މަގުސަދަކީ ޑިޖިޓަލް ލިޓަރަސީ ކުރިއަރުވައި ދައުލަތުގެ ބެލުމުގެ ދަށުގައިވާ ކުދިންގެ ތައުލީމީ ބޭނުންތަކަށް އެހީތެރިވުން ކަމަށް ދިރާގުން ބުންޏެވެ.

އަމާން ވެށި އަދި އަމާން ހިޔާތަކަކީ މިނިސްޓްރީ އޮފް ސޯޝަލް ފެމެލީ އެންޑް ޑިވެލޮޕްމަންޓުގެ ދަށުން ދައުލަތުގެ ދަށުން ކުދިން ބަލަހައްޓާ ހާއްސަ ހިޔާތަކެވެ.

ކުޑަކުދިން ރައްކާތެރިކުރުމާއި ޒުވާނުން ބާރުވެރިކުރުމަކީ ދިރާގުގެ ސީއެސްއާރު ޕްރޮގްރާމްގައި ހާއްސަ އަހައްމިއްޔަތު ކަމެއް ދޭ ދާއިރާއެކެވެ. ފާއިތުވި އަހަރުތަކުގައި ވެސް ދިރާގުން ވަނީ އަމާން ވެށި، އަމާން ހިޔާ އަދި ކުޑަކުދިންގެ ހިޔާއަށް އެހީތެރިކަން ފޯރުކޮށްދީފަ އެވެ. އަދި ކުޑަކުދިންގެ ހައްގުގައި މަސައްކަތް ކުރާ އެކި އެންޖީއޯތަކަށް އެހީތެރިކަން ފޯރުކޮށްދޭން ވެސް ދިރާގުން އަބަދުވެސް އިސްކަންދެ އެވެ.