ކެފޭ ޑި މާލެއަށް ދިން ހަމަލާ ރޭވި ކަމަށް ތުހުމަތުވާ މީހާ ހެކި ނެތިގެން ދޫކޮށްލައިފި

ހެލްމެޓް އަޅައި މޫނު ނިވާކޮށްގެން ނުރައްކާތެރި ހަތިޔާރާ އެކު "ކެފޭ ޑި މާލެ" އަށް ވަދެ އެތަނުގެ ތަކެއްޗާއި އިމާރާތަށް ގެއްލުން ދިން ހަމަލާ ރޭވި ކަމުގެ ތުހުމަތުގައި ހައްޔަރުކުރި މީހަކު ހެކި ނެތިގެން ދޫކޮށްލައިފި އެވެ.

ޖަމާއަތް ހަދައިގެން ނުރައްކާތެރި ހަތިޔާރު ބޭނުންކޮށްގެން މުދަލަށް ގެއްލުން ދިނުމުގެ ތުހުމަތުގައި ހައްޔަރުކުރީ 21 އަހަރުގެ މީހެކެވެ. އޭނާގެ މައްޗަށް ފުލުހުން ތުހުމަތު ކުރަނީ ހަމަލާ ރާވައި ހިންގި ކަމުގެ ތުހުމަތެވެ.

އޭނާ ބަންދުކުރަން ފުލުހުން އެދުނު ނަމަވެސް، ކްރިމިނަލް ކޯޓުން ވަނީ ޝަރުތުކުރުމަށް ފަހު ދޫކޮށްލައިފަ އެވެ.

ކެފޭއަށް ހަމަލާ ދިނުމުގައި އޭނާގެ ބައިވެރިވުމެއް ނެތް ކަން ފުލުހުން ވާހަކަތަކުން އެނގޭ ކަމަށާއި އަދި ހަމަލާ އިންތިޒާމްކުރީ 21 އަހަރުގެ މީހާ ކަމަށް ފުލުހުން ބުންޏަސް އެކަން ސާބިތުކޮށްދޭނެ ހެއްކެއް ހުށަހަޅާފައި ނެތް ކަމަށް ކޯޓުން ނެރުނު އަމުރުގައި ބުނެފައިވެ އެވެ.

އަދި ހަމަލާ ދިނުމުގައި ބައިވެރިވި ކަމަށް ތުހުމަތުވާ މީހުންނާ އޭނާއާ ދެމެދު އެއްވެސް ގުޅުމެއް އޮތް ކަން ދޭހަކޮށްދޭ ހެއްކެއް ވެސް ހުށަހަޅާފައި ނެތް ކަމަށް އަމުރުގައިވެ އެވެ.

ފުލުހުން ބުނެފައިވަނީ ކެފޭގެ ކޭޝް ކައުންޓަރުގެ ސޭފްޓީ ބިއްލޫރިގަނޑު ތަޅާލައި، ހެދިކާ ޑިސްޕްލޭ ކުރަން ބަހައްޓާފައި ހުރި ޝޯކޭސްގެ ބިއްލޫރިތައް ތަޅާލައި ބޭނުން ނުކުރެވޭ ވަރަށް ވަނީ ހަލާކުކޮށްފައިވަނީ ދުރާލާ ރާވައިގެން ކަމަށެވެ.

ފުލުހުން ބުނި ގޮތުގައި އެ ހަމަލާ ދިނީ ގޭންގްތަކުގެ މެދުގައި އޮތް ހިޔާލު ތަފާތުވުންތަކުގެ ތެރެއިންނެވެ. އެއީ މަސްތުވާތަކެއްޗާ ގުޅުން ހުރި މައްސަލަތަކެކެވެ. އެ ތަނަށް ގެއްލުން ދޭން އަމަލީ ގޮތުން ބައިވެރިވީ ދެ މީހެކެވެ. އެ މީހުންނަށް އެހީތެރިވާން އެހެން މީހަކު ކުރީބައިގައި އެ ތަނަށް ގޮސް ވީޑިއޯ ކޮށްފައިވާ ކަމަށް ފުލުހުން ބުންޏެވެ.