ހާރިސްގެ މަރުގެ ދައުވާލިބޭ ޔާމީން ބަންދު ނުކުރަން ހައި ކޯޓުން ނިންމައިފި

ހުޅުމާލޭ ހާފްވޭ ހައުސް ކައިރީގައި ތޫނު އެއްޗަކުން ހަމަލާދީ މަރާލި ހާރިސް އަބްދުލްއަފޫރުގެ މަރުގެ މައްސަލާގައި ދައުވާލިބޭ ޏ. ފުވައްމުލަކު ހިލްޓަން، ޔާމީން ރަޝީދު ބަންދު ނުކުރަން ހައި ކޯޓުން ނިންމައިފި އެވެ.

ސެޕްޓެމްބަރު، 2017 ގައި ހާރިސް މަރާލި މައްސަލާގައި ޔާމީންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން 2022 ވަނަ އަހަރު ހުކުމްކުރި އެވެ. އެ ހުކުމް ދައުލަތުން ވަނީ ހައި ކޯޓުގައި އިސްތިއުނާފުކޮށް، އަދި އެ މައްސަލަ ނިމެންދެން ޔާމީން ބަންދުކުރަން އެދިފަ އެވެ.

ޔާމީން ރަޝީދު ބަންދު ކުރަން ދައުލަތުން އެދުނީ އޭނާގެ މައްޗަށް އެކަށީގެންވާ ހެކި ހުރުމުންނާއި ހެކިންނަށް ނުފޫޒު ފޯރުވާނެ ކަމުގެ އިހްތިމާލު އޮތް ކަމަށް ބުނެ އެވެ. ނަމަވެސް، ހައި ކޯޓުގައި މައްސަލަ ބައްލަވާ ތިން ފަނޑިޔާރުންގެ އިއްތިފާގުން ނިންމެވީ އޭނާ ބަންދުކުރަން ނުފެންނަ ކަމަށެވެ.

ބަންދާ މެދު ހައި ކޯޓުން ނިންމި ނިންމުމުގައި ބުނީ ޔާމީން ރަޝީދަކީ ވަޒީފާއެއް އަދާކުރަމުންދާ މީހެއް ކަމަށާއި އޭނާ ބަންދުން ދޫކޮށްލި ފަހުން މިވީ މުއްދަތުގައި މުޖުތަމައުއަށް ނުރައްކާވާ ފަދަ އެއްވެސް ކަމެއް ކުރިކަމުގެ ނުވަތަ ކުރަން އުޅުނު ކަމުގެ އެއްވެސް ތުހުމަތު ކުރެވިފައިނުވާ ކަމަށެވެ.

މީގެ އިތުރުން މި ދައުވާގެ އިތުރުން ކުށުގެ ރިކޯޑެއް ވެސް ނެތް ކަމަށް ނިންމުމުގައި ފާހަގަކުރި އެވެ.

އެ ނިންމުމުގައިވަނީ ޔާމީންގެ ފަރާތުން ހެކިންނަށް ނުފޫޒު ފޯރުވުމުގެ އިހްތިމާލު އޮތް ކަމަށް ސަބަބެއް އަދި އެފަދަ އިހުތިމާލެއް ދައުލަތުން ހުށަހަޅާފައިނުވާ ކަމަށެވެ. އަދި އިސްތިއުނާފު ނިމެންދެން ޔާމީން މުޖުތަމައުއަށް ދޫވެފައި ހުރެގެން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބަލަންޖެހޭ އެއްވެސް އެހެން އިތުރު ސަބަބެއް ވެސް ހުށަހަޅާފައިނުވާ ކަމަށް ހައި ކޯޓުގެ ނިންމުމުގައިވެ އެވެ.

އެހެންވެ، ޔާމީން ރަޝީދު ބަންދުގައި ބަހައްޓަން ޖެހޭ ހާލަތެއް ނެތް ކަމަށް ނިންމާފައިވެ އެވެ.

ހާރިސްގެ މަރުގެ މައްސަލާގައި ސިއްރު ގިނަ ހެކިންތައް ވެސް އެ މައްސަލާގައި ހެކިބަސް ދޭން ކޯޓަށް ހާޒިރެއް ނުވެ އެވެ. އެ މައްސަލާގައި ފުލުހުން ކުރިން ބުނެފައިވާ ގޮތުގައި ހާރިސް މަރާލީ ކުރިން ހިނގި މާރާމާރީއެއްގެ ބަދަލު ހިފުމުގެ ގޮތުންނެވެ.