މާލެ އާއި ރަށްރަށުގައި 27،000 އަށް ވުރެ ގިނަ ހައުސިން ޔުނިޓް އަންނަ އަހަރު އަޅަން ފަށަނީ

މާލެ ސަރަހައްދުގައި 15،000 ހައުސިން ޔުނިޓާއި ރަށްރަށުގައި 12،000 ހައުސިން ޔުނިޓާ އެކު ޖުމްލަ 27،000 އަށް ވުރެ ގިނަ ހައުސިން ޔުނިޓްގެ މަސައްކަތް އަންނަ އަހަރު ސަރުކާރުން ފަށާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް ވަނީ މި ސަރުކާރުން ޕްލޭންކޮށް، ކުރިއަށް ގެންދަން ނިންމާފައިވާ ތަރައްގީގެ މަޝްރޫއުތަކުގެ ބައެއް ކަންކަން ހިއްސާކުރައްވައިފަ އެވެ. އޭގެ ތެރޭގައި، އެމަނިކުފާނުގެ އެންމެ ބޮޑު އެއް ވައުދު ކަމަށްވާ ބޯހިޔާވަހިކަން ފޯރުކޮށްދޭން ކުރިއަށް ރާވާފައިވާ މަޝްރޫއުތައް ހިމެނެ އެވެ.

ރައީސް ރޭ ވެސް ތަކުރާރު ކުރެއްވި ގޮތުގައި އަންނަ އަހަރަކީ ބޯހިޔާވަހިކަމުގެ އަހަރެވެ. ރައްޔިތުންގެ މަޖިލީހަށް އަންނަ އަހަރަށް ހުށަހަޅާފައި ވަނީ ބޯހިޔާވަހިކަމުގެ ބަޖެޓެއް ކަން ފާހަގަކުރައްވައި ވިދާޅުވީ، ގެދޮރު ބިނާކުރަން އެކަނި ވެސް 1.5 ބިލިއަން ރުފިޔާ އަދި ހައުސިން ލޯނަށް އެއް ބިލިއަން ރުފިޔާ ކަނޑައަޅާފައިވާ ކަމަށެވެ.

އެ މަނިކުފާނު ވިދާޅުވި ގޮތުގައި ބޯހިޔާވަހިކަމުގެ މައްސަލަ ހައްލުކުރަން އަންނަ އަހަރު މާލެ ސަރަހައްދުގައި 15،000 ހައުސިން ޔުނިޓު އަޅަން ފަށާނެ އެވެ. އަދި ރަށްރަށުގައި ވެސް 12،940 ހައުސިން ޔުނިޓު އަޅަން ފަށާނެ ކަމަށް، ގިނަ ބަޔަކު ބައިވެރިވި ރަސްމިއްޔާތުގައި ރައީސް ވިދާޅުވި އެވެ.

"އެއީ ހުސް ވައުދު، ހުސް ވައުދު އިނގޭތޯ. އަޅުގަނޑު ރަށްރަށަށް ގޮސް ވި ވައުދުތައް. މިސާލަކަށް ކުޅުދުއްފުށީ ސިޓީގައި އަޅާ ފްލެޓުތައް ހިމެނޭނެ އޭގެ ތެރޭގައި. ތިނަދޫ، އައްޑޫ، ފުވައްމުލައް އަދި ބައެއް ރަށްރަށް ހަމަ އަދަދުތަކާ އެކު ވައުދުވެފައި ހުންނާނެ، 30، 50، 100 އިން ލިޔެފައި ހުރި އެއްޗެހި މިއީ،" ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވިދާޅުވި އެވެ.

ރައީސް ވިދާޅުވި ގޮތުގައި އެމަނިކުފާނުގެ މި ދައުރުގެ ތެރޭގައި ފްލެޓުތައް ނިންމާ ހަވާލުކުރާނެ އެވެ.

"މިއީ ބޯހިޔާވަހިކަމުގެ ބަޖެޓެއް. އެހެންވީމަ 41 ރަށުގައި އަލަށް ހައުސިން ޔުނިޓު، އެ 41 ރަށުގައި ވެފައި ހުންނާނެ ވައުދު އަޅުގަނޑު އެ ރަށަށް ގޮސްފައި މި ވަރަށް އަޅައިދޭނަމޭ. އެ ހުރިހާ މަޝްރޫއެއް އަންނަ އަހަރު ފެށޭނެ، ހުރިހާ މަޝްރޫއެއް ފެށޭނެ،" އެ މަނިކުފާނު ވިދާޅުވި އެވެ.

އެޗްޑީސީން މިދިޔަ އަންގާރަ ދުވަހު ބޭއްވި ރަސްމިއްޔާތުގައި ވަނީ 2،100 ސޯޝަލް ހައުސިން ޔުނިޓު އަޅާނެ ކަން އިއުލާންކޮށްފަ އެވެ.