އިޒްރޭލުން ހިންގަނީ ނަސްލު ނައްތާލުމުގެ އަމަލެއް ނޫން: އިނގިރޭސި ބޮޑުވަޒީރު

ލަންޑަން (ނޮވެމްބަރު 14) – ފަލަސްތީނުގެ ޣައްޒާގައި އިޒްރޭލުން ހިންގަނީ ނަސްލު ނައްތާލުމުގެ އަމަލުތަކެއް ނޫން ކަމަށް ބުނެ އިނގިރޭސި ބޮޑުވަޒީރު ކިއޭ ސްޓާމާ، އެ ގައުމުގެ ގާނޫނޫ ހަދާ މަޖިލީހުގައި ޖަވާބުދާރީވެ ވަޑައިގެންފި އެވެ.

އިނގިރޭސި ގާނޫނުހަދާ މަޖިލިސް ހައުސް އޮފް ކޮމަންސްގައި މެންބަރަކު ކުރި ސުވާލަށް ޖަވާބު ދެއްވަމުން ސްޓާމާ ވިދާޅުވީ، ޖެނޮސައިޑް [ނަސްލު ނައްތާލުމުގެ ހަނގުރާމަ] އަކީ ކޮބައިކަން އޭނާ އަށް އެނގޭ ކަމަށެވެ. އިޒްރޭލުން އެ ހިންގާ ޖަރީމާތަކަކީ ޖެނޮސައިޑެއް ކަމަށް މާނަ ނުކުރެވޭނެ ކަމަށް، ޖުލައި މަހު ބޮޑުވަޒީރުކަމާ ހަވާލުވެ ވަޑައިގެންނެވި ސްޓާމާ ވިދާޅުވި އެވެ.

މަޖިލީހުގެ މިނިވަން މެންބަރު އައްޔޫބް ހާން، އެ ސުވާލު ފެންމަތިކުރެއްވީ، އިނގިރޭސި ހާރިޖީ ވަޒީރު ޑޭވިޑް ލަމީ ދެއްކެވި ވާހަކައަކާ ގުޅިގެންނެވެ.

ޑޭވިޑް ލަމީ ވިދާޅުވީ ރުވާންޑާގައި ހިންގި ޖަރީމާ އާއި ދެވަނަ ބޮޑު ހަނގުރާމައިގައި ޖަރުމަނުގައި މިލިއަނުން މީހުން މެރި ނަސްލު ނައްތާލުމުގެ އަމަލުތަކާ ދެކޮޅަށް ބޭނުންކުރާ ބަސްމަގެއް އިޒްރޭލްގެ ހަމަލާތަކާ ގުޅުވައިގެން ދެއްކުމުން އެ ވާހަކައިގެ ސީރިއަސްކަމާ މެދު ސުވާލު އުފެދޭ ކަމަށެވެ.

ބޮޑުވަޒީރާ، ސުވާލު ކުރައްވަމުން އައްޔޫބު ހާން ވިދާޅުވީ އދ. ގެ ޖެނޮސައިޑް މަނާކުރާ މުއާހަދާގެ ދެވަނަ މާއްދާއާ، ޑެވިޑް ލަމީގެ ވާހަކައާ ފުށުއަރާ ކަމަށެވެ. އެކަމުގައި ބޮޑުވަޒީރު ދެކެވަޑައިގަންނަވާ ގޮތް މަޖިލީހާ ހިއްސާ ކުރުމަށް އައްޔޫބް ހާން އެދިވަޑައިގެންނެވި އެވެ.

އެ ސުވާލަށް ޖަވާބު ދެއްވަމުން، ސްޓާމާ ވިދާޅުވީ މިދިޔަ އަހަރު އިކްޓޯބަރު މަހު ހަތްވަނަ ދުވަހު ހިންގި ކަންކަމުގެ ވާހަކައިން ފަށަން ޖެހޭ ކަމަށެވެ.

"މިދިޔަ އަހަރުގެ އޮކްޓޫބަރު މަހު ހިނގި ކަންކަމަށް އިޝާރާތްކޮށް އެފަދަ ސުވާލެއް ފެށުން ބުއްދިވެރި. އަޅުގަނޑަށް ޖެނޮސައިޑްގެ މާނަ ވަރަށް ރަނގަޅަށް އެނގޭ. އެހެންވީމާ، ދުވަހަކުވެސް މިކަން އެއީ ޖެނޮސައިޑެއްގެ ގޮތުގައި އަޅުގަނޑު ސިފަކޮށްފައެއް ނުވާނެ،" މަޖިލީހުގެ މެންބަރުންނާ މުހާތަބުކޮށް ސްޓާމާ ވިދާޅުވި އެވެ.

އދ. އިން ފަލަސްތީނަށް ކަނޑައަޅުވާފައިވާ ސްޕެޝަލް ރެޕަޓުއާ ފްރެންސެސްކާ އަލްބަނީޒް ތަކުރާކޮށް ވިދާޅުވަމުން ގެންދަވަނީ އިޒްރޭލުން ޣައްޒާގައި ހިނގަމުންދާ ޖަރީމާތައް ނަސްލު ނައްތާލުމުގެ އަމަލެއްގެ ގޮތުގައި ބަލަންޖެހޭ ޝަރުތު ހަމަވާ ކަމަށެވެ. ރަސްމީ ދަތުރެއްގައި މިވަގުތު އޭނާ އުޅުއްވަނީ އިނގިރޭސިވިލާތުގަ އެވެ.

ގާތްގަނޑަކަށް މިދިޔަ 400 ދުވަހުގެ ތެރޭގައި އިޒްރޭލުން ވަނީ ޣައްޒާގައި 45،000 އަށް ވުރެ ގިނަ މީހުން ޝަހީދުކޮށްލައިފަ އެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.