އަޖޭގެ ރިލީޒްނުވެ އޮތް ފިލްމެއް 10 އަހަރު ފަހުން ގެނެސްދެނީ

މީގެ 10 އަހަރު ކުރިން މަސައްކަތް ނިމިފައި އޮތް ބޮލީވުޑްގެ އެކްޓަރު އަޖޭ ދޭވްގަންގެ ފިލްމު "ނާމް" އަންނަ މަހު ޕްރިމިއާކުރަން ނިންމައިފި އެވެ.

އެއީ "ބޫލް ބުލައްޔާ" 2 އަދި 3 ގެ ޑައިރެކްޓަރު އަނީސް ބަޒްމީގެ ފިލްމެކެވެ.

އެ ފިލްމު ގެނެސްދޭ ރޫންގުތާ އެންޓަޓެއިންމަންޓާއި ސްނިގުދާ މޫވީސް ޕްރައިވެޑް ލިމިޑެޓުން މިހާރު ވަނީ އަންނަ މަހު 22 ގައި އެ ފިލްމު ޕްރިމިއާކުރާނެ ކަން އިއުލާންކޮށްފަ އެވެ.

"ނާމް"ގައި އަޖޭއާ އެކު މުހިންމު ރޯލުތައް ކުޅުނީ ބޫމިކާ ޗަވްލާ އަދި ސަމީރާ ރެއްޑީ އެވެ.

އެ ފިލްމަކީ އަޖޭ އާއި އަނީސް އެކުގައި މަސައްކަތްކުރި ހަތަރު ވަނަ ފިލްމެވެ. އެ ދެމީހުން ގުޅިގެން ކުރިން ގެނެސްދިން ފިލްމުތަކުގެ ތެރޭގައި އެކްޝަން ތުރިލާ "ހަލްޗަލް" (1995) އާއި ރޮމޭންޓިކް ކޮމެޑީ "ޕިޔާރް ތޯ ހޯނާ ހީ ތާ" (1998) އަދި ސައިކޮލޮޖިކަލް ތުރިލާ "ދީވާންގީ" (2002) ހިމެނެ އެވެ.

"ނާމް"ގެ މަސައްކަތްތައް 2014 ވަނަ އަހަރު ނިމުނު ނަމަވެސް، އެ ފިލްމު ރިލީޒްނުކުރެވި ލަސްވީ ފިލްމުގެ ޕްރޮޑިއުސަރަކު މަރުވުމުންނެވެ. އެ ޕްރޮޑިއުސަރުގެ މަރާ ގުޅިގެން ފިލްމު ޕްރިމިއާކުރުން ފަސްކުރުމަށް ފަހު، އޭގެ ފަހުން ޑިސްޓްރިބިއުޓަރުން ނުލިބިގެން ފިލްމު ނޭޅުވި ދިގުލައިގެން ދިޔައީ އެވެ.

މި ފިލްމުގެ ކުރިން އަޖޭގެ އެހެން ފިލްމެއް ސިނަމާތަކަށް އަންނާނެ އެވެ. އެއީ އޭނާ ފުލުހެއްގެ ރޯލު ކުޅޭ ބޮލީވުޑްގެ އެންމެ ބޮޑު ފިލްމް ފްރެންޗައިޒް "ސިންގަން"ގެ ތިންވަނަ ފިލްމު "ސިންގަމް އެގެއިން" އެވެ. އެ ފިލްމު ޕްރިމިއާކުރަނީ އަންނަ މަހު އެކެއްގަ އެވެ.