ސްޓެލްކޯއިން މެކޭނިކަލް ޓްރެއިނިން ސެންޓަރެއް، އެއްފަހަރާ 100 މީހުންނަށް ތަމްރީން ދެވޭނެ

އިންޖިނިއަރިންގެ ދާއިރާއިން ރާއްޖެއިން ބޭރުގައި ކިޔަވައިގެން އަންނަ ދިވެހިންގެ އަދަދު ވެސް މިހާރު މަދެއް ނޫނެވެ. ބޮޑު ހަރަދު ކޮށްގެން ކުންފުނިތަކުގެ ހަރަދުގައި ނުވަތަ އަމިއްލަ ހަރަދުގައި ކިޔަވާ ނިމޭއިރު އަތުން ގިނަ އަދަދެއްގެ ފައިސާ ފައިސާ ހަރަދުވެ އެވެ.

ކަރަންޓްގެ ހިދުމަތް ދޭ ސަރުކާރުގެ ކުންފުނި، ސްޓެލްކޯއިން ވެސް މިހާތަނަށް އެތަނުގެ މުވައްޒަފުންނަށް ތައުލީމާއި ތަޖްރިބާ ދިނުމަށް ރާއްޖެއިން ބޭރަށް ފޮނުވަނީ އެވެ. އެހެން ނަމަވެސް މިހާރު ހިނގަމުންދާ ހަރަދުތައް ސަލާމަތް ކުރުމަށް ސްޓެލްކޯއިން ނިންމީ ރާއްޖޭގައި ޓްރެއިނިން ސެންޓަރެއް އެޅުމަށެވެ.

މިދިޔަ ޖޫން މަހު ކ. ތުލުސްދޫގައި ސްޓެލްކޯއިން އަޅަންފެށި މެކޭނިކަލް ޓްރެއިނިން ސެންޓަރާ ގުޅޭގޮތުން ސްޓެލްކޯގެ ރީޖަނަލް ޑިޕާޓްމަންޓްގެ ޖެނެރަލް މެނޭޖަރު މުހައްމަދު ޔާސިރު "މިހާރު" އަށް ވިދާޅުވީ އެ ކުންފުނިން ރާއްޖެއިން ބޭރަށް އަހަރަކު ހަތަރު ވަރަކަށް މުވައްޒަފުން ފޮނުވާ ކަމަށެވެ.

ހަތަރު މުވައްޒަފުން 15 ދުވަހުގެ ޓްރެއިނިންއަކަށް ފޮނުވުމަށް ހަތަރު ލައްކައަށް ވުރެ ގިނަ ރުފިޔާ އަހަރަކު ހަރަދުވާ ކަމަށާއި އެތަން އެޅުމަށް ނިންމީ ސްޓްރެސް ފްރީ މާހައުލެއްގައި ރާއްޖޭގައި ތިބެގެން ހަރަދު ކުޑަކޮށް ކިޔެވޭނެ އިންތިޒާމު ހަޖެއްސުމަށް ކަމަށް ޔާސިރު ވިދާޅުވި އެވެ.

ތުލުސްދޫ ޓްރެއިނިން ސެންޓަރު

ރަށެއްގެ އިންޖީނު ނިވިއްޖެނަމަ، ނުވަތަ ކަރަންޓުގެ ހިދުމަތް މެދުކެނޑިއްޖެނަމަ އެންމެ ގިނަވެގެން ފަސް ދުވަސް ތެރޭގައި އެ ހިދުމަތް ދޭން ފަށަން ޖެހެ އެވެ. އެފަދަ ހާލަތްތަކުގައި މާލެއިން ވެސް މުވައްޒަފުން ފޮނުވަން ޖެހެ އެވެ. އެ މީހުން ރަށްރަށަށް ފޮނުވާ އަނެއް ސަބަބަކީ ސްޓެލްކޯގެ ސްޓާފުން އެފަދަ މަސައްކަތަށް ޓްރެއިންކޮށް، ތަޖުރިބާ ހޯދައި ދިނުމެވެ.

ނަމަވެސް ތަމްރީނަށް ރަށްރަށަށް ފޮނުވަން ނުޖެހި، އެ ދާއިރާއިން ތަމްރީން ދިއުމަށް އެންމެ ބޮޑު ލުޔަކަށް ވާނީ ތުލުސްދޫގެ ޓްރެއިނިން ސެންޓަރެވެ.

"މި ޓްރެއިނިން ސެންޓަރުގައި އަޅުގަނޑުމެން މިހާރު ބޭނުންކުރާ ހުރިހާ ސީރީޒެއްގެ ޖަނަރޭޓަރުތައް ހުންނާނެ، ކިޔަވައި ދޭނީ ސްޓެލްކޯގެ މުވައްޒަފުންނާއި އެ ދާއިރާއިން ކިޔަވައިގެން ތިބި ބޭފުޅުން" ޔާސިރު ވިދާޅުވި އެވެ.

އެ ތަނުގައި ތަމްރީނާއި ތަޖްރިބާ ހޯދާ މީހުންނަށް އެކޮމޮޑޭޝަނާއެކު ގާއިމް ކުރާ އެ ސެންޓަރުގައި ޓްރެއިނިން ރޫމާއި އިލެކްޓްރިކަލް ޓްރެއިނިން ރޫމުތަކާއި ކޮންޓްރޯލް ޓްރެއިނިން ރޫމުތަކާއި މެކޭނިކަލް ޓްރެއިނިން ރޫމުތަކާއި ބޭނުންވެއްޖެ ހާލަތެއްގައި ބޭނުން ކުރުމަށް އެމްވީއެޗްވީ ރޫމުތައް ވެސް ހުންނާނެ ކަމަށް ޔާސިރު ވިދާޅުވި އެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިދިޔަ ހޯމަ "މިހާރު" އަށް ދެއްވި އިންޓަވިއުއެއްގައި ވިދާޅުވީ ތުލުސްދޫގައި އެ ސެންޓަރު އެޅުމަށް ނިންމީ އެ ރަށު ކައުންސިލުން ލިބުނު އެއްބާރުލުމުގެ ސަބަބުން ކަމަށެވެ.

އެ ސެންޓަރުގެ އެންމެ ބޮޑު ބޭނުމަކީ މެކޭނިކަލް އިންޖިނިއަރިންގެ ދާއިރާއިން ޒުވާނުން ތަމްރީންކޮށް، ކުންފުނީގައި މިވަގުތު މަސައްކަތް ކުރަމުން އަންނަ މުވައްޒަފުންނަށް ވެސް ޓްރެއިނިން ދީ އެ ދާއިރާއިން ސަނަދެއް ލިބޭނެ ގޮތް ހެދުމަށް ކަމަށް ފަހުމީ ވިދާޅުވި އެވެ.

"އަޅުގަނޑުމެން އަތުގައި އެބަހުރި އިކުއިޕްމެންޓް. އަޅުގަނޑުމެންގެ މި ދާއިރާއިން ކިޔަވައި ދެވޭނެ، ކިޔަވައިގެން ތިބި އިންޖިނިއަރުން އެބަ ތިބި. އެހެންވެ މި ދާއިރާއަށް ޝައުގުވެރިވާ މީހުންނަށް މި ފުރުސަތު ފަހިކޮށް ނުދޭންވީ އެއްވެސް ސަބަބެއް ނެތް،" އެއްފަހަރާ 100 އެއްހާ މީހުން ތަމްރީނު ދެވޭ މިންވަރަށް ގާއިމްކުރާ އެ ސެންޓަރާ ގުޅޭގޮތުން އޭނާ ވިދާޅުވި އެވެ.

ފަހުމީ ވިދާޅުވީ ސްޓެލްކޯއިން ނިންމާފައި ވަނީ ޓްރެއިނިންގެ ވަކި ލެވަލްއެއް ފުރިހަމަ ކޮށްގެން ނޫނީ އެ ކުންފުނީގައި އިންޖިނިއަރިން ދާއިރާގައި މަސައްކަތް ނުކުރެވޭ ގޮތަށް ހެދުމަށް ކަމަށެވެ.

އެ ސެންޓަރުގައި ކިޔަވަން ބޭނުންވާނަމަ، ޖެހޭނީ އެކަމަށް އެދި ސްޓެލްކޯއަށް ހުށަހަޅާށެވެ. އަދި ސްޓެލްކޯއިން ނިންމާފައި ވަނީ ގައުމީ ޔުނިވާސިޓީ (އެމްއެންޔޫ) އާ އެކު ކުރިއަށް ދިއުމަށެވެ. ފަހުމީ ވިދާޅުވީ ކޯހަށް ވަނުމަށް އެދެން ޖެހޭނީ ޔުނިވާސިޓީގައި ކަމަށެވެ.

"އެއީ އެ ލިބޭ ސަނަދަކީ ސްޓެލްކޯއިން ދޭ ސަނަދަކަށް ވެގެން އެ އެހާ ވެލިޑެއް ނުވޭ. އެހެން ނަމަވެސް ކަރިކިއުލަމްގެ ތެރެއިން ހިމެނިގެން، އެމްއެންޔޫ ކަހަލަ އެމްކިޔުއޭއިން ގަބޫލުކުރާ ސަނަދެއް ދެވޭ ތަނަކަށް މިތަން ވެގެން ދާނެ،" އޭނާ ވިދާޅުވި އެވެ.

އެ ކުންފުނީގެ އަމާޒަކީ އަހަރަކު 300 އެއްހާ މީހުން އެ ތަނުން ތަމްރީން ކުރުމެވެ.