އޮލިމްޕިކްސްގެ ޕެރަ ގޭމްސްގައި ރާއްޖޭން ވާދަކުރާނީ ފާތުން އަދި ރައްޒާގް

އޮލިމްޕިކްސްގެ ޕެރަ ގޭމްސްގައި ވާދަކުރުމުގެ ފުރުސަތު ދެ ދުވުންތެރިން ކަމަށްވާ ފާތިމަތު އިބްރާހިމާއި އަބްދުރައްޒާގަށް ލިބިއްޖެ އެވެ.

ލޮލަށް ފެނުމުން މަހުރޫމް ވެފައިވާ އެ ދެ ދުވުންތެރިންނަށް ޕެރަލިމްޕިކްސް ގޭމްސްގައި ވާދަކުރުމުގެ ފުރުސަތު ދިނީ ރާއްޖޭގެ ރޭންކިންގެ އެންމެ ކުރީގައި އޮތް ދެ ދުވުންތެރިންނަށް ވާތީ އެވެ.

އޮލިމްޕިކްސްގެ ޕެރަ ކަޓަގަރީ ނުވަތަ ޕެރަލިމްޕިކްސްއަކީ ނުކުޅަދޭ މީހުންނަށް ހާއްސަކޮށް، ދުނިޔޭގެ އޮލިމްޕިކް ކައުންސިލުން ބާއްވާ ގޭމްސް އެކެވެ. ކޮންމެ އަހަރަކު ވެސް އޮލިމްޕިކްސް އަށް ފަހު ޕެރަ ގޭމްސް، އޮލިމްޕިކްސް ބޭއްވި ގައުމުގައި ބާއްވަ އެވެ. މި ފަހަރު ޕެރަލިމްޕިކްސް ވެސް އޮންނާނީ ފްރާންސްގެ ޕެރިހުގަ އެވެ.

ޕެރަލިމްޕިކްސްގައި މީގެ ކުރިން ވެސް ފާތުން ވަނީ ވާދަކޮށްފަ އެވެ. ޖަޕާނުގައި 2021 ގައި ބޭއްވި 2020 ގެ ޕެރަ ގޭމްސް އަކީ، ރާއްޖޭގެ އެތުލީޓުން އެންމެ ފުރަތަމަ ވާދަކުރި ޕެރަލިމްޕިކްސް ގޭމްސް އެވެ.

އެންމެ ފަހުން ޓޯކިޔޯގައި އޮތް ޕެރަލިމްޕިކްސްގެ ދުވުމުގެ އިވެންޓްގައި ވާދަކޮށް ފާތުން ވަނީ ރޭސް ނިންމައިފަ އެވެ. އެއާ އެކު އޭނާ އަކީ ޕެރަލިމްޕިކް ގޭމްސްއެއްގައި ރޭހެއް ނިންމި ރާއްޖޭގެ ފުރަތަމަ އެތުލީޓެވެ. ފާތުން ވަނީ މިދިޔަ އަހަރު މަޑަގަސްކަރާގައި ބޭއްވި އިންޑިއަން އޯޝަން އައިލެންޑް ގޭމްސްއިން ބްރޯންޒް މެޑަލް ހޯދައިފަ އެވެ.

އެ ފަހަރު ޕެރަ ގޭމްސްގައި ވާދަކުރި ފިރިހެން އެތުލީޓަކީ މުހައްމަދު މާޒިން އެވެ.

މި ފަހަރު ފިރިހެން އެތުލީޓުގެ ގޮތުގައި ވާދަކުރާ ރައްޒާގް ދުވުމުގެ ޓްރޭނިން ހަދަން ފެށީ 2022 ގަ އެވެ. އޭނާގެ ފުރަތަމަ މަލްޓި ސްޕޯޓްސް ގޭމްސް އަކީ މިދިޔަ އަހަރުގެ އިންޑިއަން އޯޝަން އައިލެންޑް ގޭމްސް އެވެ. އެ ގޭމްސްގައި އޭނާ ވަނީ ބްރޯންޒް މެޑަލް ހޯދައިފަ އެވެ.

މީގެ ކުރިން "މިހާރު" އަށް ދިން އިންޓަވިއުއެއެއްގައި ރައްޒާގު ބުނީ އިންޓަނޭޝަނަލް މުބާރާތަކުން ރާއްޖެ އަށް މެޑަލް ހޯދައި ދިނުމަކީ އޭނާގެ ބޮޑު އުއްމީދެއް ކަމަށެވެ. އޭނާ ބުނީ ތިން ރޭހެއް އޭނާގެ ކުރީމަތީގައި އެބައޮތް ކަމަށެވެ. ތިން ރޭހުގެ ގޮތުގައި އޭނާ ސިފަ ކުރާ ޓާގެޓްތަކުގެ ތެރެއިން ފުރަތަމަ ދެ ޓާގެޓް މިހާރު އޭނާ ވަނީ ހާސިލުކޮށްފަ އެވެ. އެއީ އިންޓަނޭޝަނަލް ގޭމްސް އަކުން ރާއްޖެ އަށް މެޑަލް ހޯދައި ދިނުމާއި މި ފަހަރުގެ ޕެރަލިމްޕިކްސްއިން ޖާގަ ހޯދުމެވެ. އޭނާގެ ތިން ވަނަ ޓާގެޓަކީ އޭނާ ފަށައިފައިވާ ގުރުއާން ހިތުދަސް ކުރުމުގެ ޕްރޮގްރާމް ފުރިހަމަކޮށް ހާފިޒުކަމުގެ ސަނަދު ހޯދުމެވެ.

ފާތުންނާއި ރައްޒާގް، ފްރާންސަށް ފުރާނީ މި އަންނަ އަންގާރަ ދުވަހު އެވެ. ގޭމްސް އަށް ތައްޔާރުވުމުގެ ގޮތުން ރައްޒާގު އާއި އޭނާގެ ކޯޗިން ޓީމު ތިބީ ހުޅުމާލޭގައި ކޭމްޕްކޮށްގެންނެވެ.