ހިއުމަން ޑިވެލޮޕްމަންޓް އިންޑެކްސް އިން ރާއްޖެ އަށް މި ފަހަރު ވެސް ކުރިއެރުން

ޔޫއެންޑީޕީން ކޮންމެ އަހަރަކު އާންމުކުރާ ހިއުމަން ޑިވެލޮޕްމެންޓް އިންޑެކްސް (އެޗްޑީއައި) ގައި މި ފަހަރު ވެސް ރާއްޖެ އިން ކުރިއެރުންތަކެއް ހޯދައިފި އެވެ.

އިންސާނީ ވަަަސީލަތް ކުރިއެރުން އަންގައިދޭ އެ އިންޑެކްސްގައި މި ފަހަރު 191 ގައުމެއް ހިމެނޭއިރު، ރާއްޖެ އޮތީ 90 ވަނައިގަ އެވެ. އެ އިންޑެކްސްގައި 2020 ގައި ރާއްޖެ އޮތީ 97 ވަނައިގަ އެވެ. ރާއްޖެ ހިމެނެނީ ހައި ހިއުމަން ޑިވެލޮޕްމެންޓު އިންޑެކްސްގެ ގައުމުތަކުގެ ތެރޭގަ އެވެ.

މި ސަރަހައްދުގެ ގައުމުތަކުގެ ތެރެއިން އެ ލިސްޓުގެ އެންމެ ކުރީގައި މި ފަހަރު އުޅެނީ ސްރީ ލަންކާ އެވެ. ހައި ހިއުމަން ޑިވެލޮޕްމެންޓު ގައުމުތަކުގެ ތެރޭގައި ހިމެނޭ ސްރީ ލަންކާ އޮތީ ލިސްޓުގެ 73 ވަނައިގަ އެވ

މި ސަރަހައްދުގެ އެހެން ގައުމުތަކަށް ބަލާއިރު ބޫޓާން 127 ވަނައިގައި އަދި އިންޑިއާ އޮތީ 131 ވަނައިގަ އެވެ. ނޭޕާލް އުޅެނީ 141 ވަނައިގަ އެވެ. އެޗްޑީއައި އިން ޕާކިސްތާނަށް ލިބެނީ 161 ވަނަ އެވެ. އަފްގާނިސްތާނު އޮތީ 180 ވަނައިގަ އެވެ.

މިދިޔަ އަހަރުތަކަށް ބަލާއިރު 2019 ވަނަ އަހަރު ރާއްޖޭގެ އެޗްޑީއައި ވެލިއުއަކީ 0.740 އެވެ. މި ފަހަރު އެ އަދަދު ވަނީ އިތުރުވެ 0.747 އަށް މަތިވެފަ އެވެ.

ރާއްޖޭގެ އުފެއްދުންތެރިކަމުގެ ނިސްބަތުން ބޮލަކަށް ޖެހޭ ވަރު 1990 ވަނަ އަހަރު 6،261 ޑޮލަރު ގައި ހުރުމަށް ފަހު، ކުރިއެރުން ހޯދަމުން އައިސް މިހާރު އުޅެނީ 15،448 ޑޮލަރުގަ އެވެ. އެއީ 2،38،208.16ރ އެވެ. އެ އަދަދު 2019 ގައި ހުރީ 12،549 ގަ އެވެ.

މި ފަހަރުގެ އިންޑެކްސް އަށް ބަލާއިރު ރާއްޖޭގައި މީހުން މަރުވާ އެވްރެޖް އުމުރު އުޅެނީ 79.9 ގަ އެވެ.

އެ އިންޑެކްސް ޔޫއެންޑީޕީން ތައާރަފްކުރީ 1990 ވަނަ އަހަރު އެވެ. އޭގެ ފަހުން ކޮންމެ އަހަރަކު ވެސް އެ މައުލޫމާތުތައް އަންނަނީ ހާމަކުރަމުންނެވެ.