ގޮނޑުދޮށް ހިމާޔަތް ކުރުމުގެ އިތުރު ދެ ޕްރޮޖެކްޓެއް އެމްޓީސީސީއާ ހަވާލުކޮށްފި

ގޮނޑުދޮށް ހިމާޔަތް ކުރުމުގެ އިތުރު ދެ ޕްރޮޖެކްޓެއް ޕްލޭނިން މިނިސްޓްރީން އެމްޓީސީސީއާ މިއަދު ހަވާލުކޮށްފި އެވެ.

ހދ. ކުޅުދުއްފުށި އެއާޕޯޓާއި ނ. ކުޑަފަރީގެ ގޮނޑުދޮށް ހިމާޔާތް ކުރުމުގެ މަޝްރޫއުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ ސީއީއޯ އާދަމް އާޒިމެވެ. މިނިސްޓްރީން ސޮއިކުރެއްވީ ޑިރެކްޓަ ޖެނެރަލް ފާތިމަތު ޝާނާ ފާރޫގެވެ.

ކުޅުދުއްފުށީ އެއާޕޯޓުގެ ގޮނޑުދޮށުގެ މަސައްކަތް އެމްޓީސީސީއާ ހަވާލުކުރީ 200 ދުވަހުގެ ތެރޭގައި ނިންމާ ގޮތަށް 42.37 މިލިއަން ރުފިޔާ އަށެވެ. މި މަޝްރޫއުގެ ދަށުން 882 މީޓަރުގެ ބޮޑު ހިލަ ޖަހައި 30 މީޓަރުގެ ރިވެޓްމެންޓް ޖަހާނެ އެވެ.

ކުޑަފަރީގެ ގޮނޑުދޮށް ހިމާޔަތް ކުރުމުގެ މަސައްކަތް ހަވާލުކުރީ 300 ދުވަހުގެ ތެރޭގައި ނިންމާ ގޮތަށެވެ. އެ މަޝްރޫއަށް 15.01 މިލިއަން ރުފިޔާ ހަރަދުވާއިރު، އެ މަޝްރޫއުގެ ދަށުން 718 މީޓަރުގެ ރިވެޓްމަންޓް ޖަހާނެ އެވެ.

މި ދެ މަޝްރޫއުގެ އެންވަޔަރްމެންޓަލް އިމްޕެކްޓް އެސެސްމަންޓް (އީއައިއޭ) ހަދާނީ ވެސް އެމްޓީސީސީންނެވެ.

އެކި ރަށްރަށުގެ ބަނދަރާއި ގޮނޑުދޮށްތައް ހިމާޔަތްކުރުމުގެ ގިނަ މަޝްރޫއުތަކެއް މިހާރު ވެސް މި ސަރުކާރުން ވަނީ އެމްޓީސީސީއާ ހަވާލުކޮށްފަ އެވެ.