ބީއެމްއެލް އަށް ގިނަ ދުވަހު ހިދުމަތް ކުރި މުވައްޒަފުންނަށް އެވޯޑް ދީފި

ބޭންކް އޮފް މޯލްޑިވްސް (ބީއެމްއެލް) އަށް ގިނަ ދުވަހު ހިދުމަތް ކުރި 31 މުވައްޒަފަކަށް ރޭ އެވޯޑް ދީފި އެވެ.

ބީއެމްއެލްގައި ބޭއްވި ހަފްލާއެއްގައި އެވޯޑް ދީފައި ވަނީ 15 އަހަރަށް ވުރެ ގިނަ ދުވަހު އެ ބޭންކަށް ހިދުމަތް ކޮށްދީފައިވާ ފަރާތްތަކަށެވެ. އޭގެ ތެރޭގައި، 15 އަހަރާއި 20 އަހަރާއި 25 އަހަރު އަދި 30 އަހަރުގެ މުއްދަތަކަށް ބޭންކުގެ ވަޒީފާގައި އުޅެފައިވާ ފަރާތްތައް ހިމެނެ އެވެ.

އެ މުވައްޒަފުންނަށް އެވޯޑް ހަވާލު ކޮށްދެއްވުމަށް ފަހު، ބީއެމްއެލްގެ ސީއީއޯ އަދި މެނޭޖިން ޑިރެކްޓަރު އެންޑްރޫ ވަނީ އެ ފަރާތްތަކަށް ޝުކުރު އަދާކުރައްވައިފަ އެވެ. އޭނާ ވިދާޅުވީ އެ މުވައްޒަފުންގެ މަސައްކަތާއި ކުންފުންޏަށް އޮތް އިތުބާރު ބަލައިގަނެ، އެ ކަމުގެ އަގު ވަޒަންކުރުމަކީ އޭނާ އަށް ލިބޭ އުފަލެއް ކަމަށެވެ.

"ތިއީ މި ބޭންކުގެ އެންމެ ބޮޑު ރައުސުލްމާލު،" އެންޑްރޫ ވިދާޅުވި އެވެ.

ގިނަ ދުވަހު ހިދުމަތް ކޮށްފައިވާ މުވައްޒަފުންނަށް އެވޯޑް ދޭން ބީއެމްއެލް އިން ފެށީ މިދިޔަ އަހަރު އެވެ. އަދި މި އެވޯޑް ކޮންމެ އަހަރަކު ދޭން ވަނީ ނިންމައިފަ އެވެ.